Бу йил мамлакатимизда Иккинчи жаҳон урушида қозонилган ғалабанинг 80 йиллиги ҳамда 9 май – Хотира ва қадрлаш куни “Ватан равнақи, тинчлиги ва ҳимояси йўлидаги қаҳрамонлик унутилмайди” шиори остида кўтаринки руҳда ўтказилмоқда.
Ҳар йили кенг нишонланадиган мазкур 9 май – Хотира ва қадрлаш куни барчамиз учун юксак маънавий ва тарихий аҳамиятга эга бўлган муҳим сана ҳисобланади.
Бу кунда Иккинчи жаҳон уруши қатнашчилари ва фронт орти меҳнат фахрийлари, мустақиллигимизни мустаҳкамлаш, халқимиз тинчлиги, мамлакатимиз равнақи йўлида жасорат ва фидойилик кўрсатган юртдошларимиз хотирланади, айни вақтда ҳаёт бўлган меҳнат фахрийлари ва кексаларимизга ҳурмат-эҳтиром кўрсатилади. Бу эса миллатимизга хос бўлган эзгу қадриятларимизнинг ёрқин мисолидир.
Азиз ватандошлар!
Сизларни бугунги шонли сана билан самимий муборакбод этишдан ғоят мамнунмиз! Юртимиз тинч, осмонимиз мусаффо бўлсин. Ватанимиз тинчлиги осойишталигига кўз тегмасин. Эзгу қадриятларимиздан бири бўлган хотирлаш ва қадрлашдек улуғ инсоний фазилатлар бардавом бўлсин!
Эл-юрт тинчлиги, халқимиз фаровонлиги йўлида хизмат қилаётган ҳар бир юртдошимизга тинчлик омонлик, сиҳат-саломатлик тилаймиз.
Байрамингиз муборак бўлсин!
Марказий сайлов комиссияси
