O‘zbekiston Respublikasi
Markaziy saylov komissiyasining qarori
№ 1216 2023-yil 23-mart
O‘zbekiston Respublikasi Markaziy saylov komissiyasi huzurida tezkor axborot berish markazi faoliyatini tashkil etish to‘g‘risida
“O‘zbekiston Respublikasining referendumi to‘g‘risida”gi O‘zbekiston Respublikasi Qonunining 7 va 251-moddalari va O‘zbekiston Respublikasi Saylov kodeksining 16-moddasiga muvofiq, O‘zbekiston Respublikasining referendumini o‘tkazish davrida jismoniy va yuridik shaxslarning (keyingi o‘rinlarda – fuqarolar) murojaatlari tezkor va samarali ko‘rib chiqilishini, fuqarolarga referendumni o‘tkazishga oid masalalar yuzasidan tezkor hamda qulay tarzda huquqiy tushuntirish va maslahatlar berilishini tashkil etish maqsadida, O‘zbekiston Respublikasi Markaziy saylov komissiyasi qaror qiladi:
1. O‘zbekiston Respublikasining referendumi davrida O‘zbekiston Respublikasi Markaziy saylov komissiyasi huzurida tezkor axborot berish markazi (keyingi o‘rinlarda – “Call-center”) tashkil etilsin.
2. O‘zbekiston Respublikasi Markaziy saylov komissiyasi huzuridagi tezkor axborot berish markazi to‘g‘risidagi nizom ilovaga muvofiq tasdiqlansin.
3. Belgilansinki, “Call-center” Toshkent shahri, Navoiy ko‘chasi, 1-uyda (Maʼrifat markazi, Simpoziumlar saroyi binosi) joylashtiriladi hamda 2023-yil 1-apreldan boshlab referendum yakunlari rasmiy eʼlon qilinadigan kunga qadar faoliyat olib boradi.
4. O‘zbekiston Respublikasi Raqamli texnologiyalar vazirligi:
respublika bo‘ylab fuqarolar tomonidan “Call-center”ga chiquvchi qo‘ng‘iroqlarni amalga oshirish uchun ko‘p tarmoqli va qisqa raqamli alohida aloqa liniyasi ajratilishi hamda uning uzluksiz ishlashini;
ikki kun ichida “Call-center” faoliyatini samarali tashkil etish uchun zarur texnika vositalari (kompyuter, printer, skaner, telefon apparati, quloqchin, mikrofon, LED-monitor va boshqa zarur vositalar) bilan jihozlanishini, shuningdek ularni telekommunikatsiya tarmoqlariga (telefon va yuqori tezlikdagi Internet) ulanishini taʼminlasin.
5. O‘zbekiston Respublikasi Markaziy saylov komissiyasi Kotibiyatining Yuridik taʼminlash va murojaatlarni ko‘rib chiqish bo‘limi (I.Xadjiyev) “Call-center” faoliyati ustidan nazorat o‘rnatilishini va monitoring yuritilishini taʼminlasin.
6. Mazkur qaror O‘zbekiston Respublikasi Raqamli texnologiyalar vazirligi bilan kelishilgan.
7. Mazkur qaror O‘zbekiston Respublikasi Markaziy saylov komissiyasining rasmiy veb-saytida eʼlon qilinsin.
8. Mazkur qarorning ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari B.Kuchkarov zimmasiga yuklatilsin.
Rais Z. Nizamxodjayev
ILOVA
