O‘zbekiston Respublikasi Saylov kodeksining 5-moddasiga ko‘ra, saylovga tayyorgarlik ko‘rish hamda uni o‘tkazishga doir barcha tadbirlarda, shuningdek saylov kuni ovoz berish xonalarida va ovozlarni sanab chiqishda MSK tomonidan akkreditatsiyadan o‘tkazilgan OAV vakillar ishtirok etishi mumkin.

Boshqa davlatlardan, xalqaro tashkilotlardan kuzatuvchilar saylov kampaniyasi davrida Markaziy saylov komissiyasi tomonidan akkreditatsiyadan o‘tkaziladi. Xalqaro kuzatuvchilarga akkreditatsiyadan o‘tganlik to‘g‘risidagi guvohnomaning amal qilish muddati ular akkreditatsiyadan o‘tganligi to‘g‘risidagi MSK qarori qabul qilingan kundan boshlab, saylovning yakuniy natijalari e’lon qilingan kunga qadar amal qiladi.

Saylov byulletenlari davlat tilida, shuningdek tegishli hududiy, tuman va shahar saylov komissiyasining qaroriga binoan tegishli hudud aholisining ko‘pchiligi so‘zlashadigan tillarda chop etiladi.