O‘zbekiston Respublikasi
Markaziy saylov komissiyasining qarori
№ 1199 2023-yil 18-yanvar
Buxoro, Navoiy, Toshkent, Jizzax va Sirdaryo viloyatlarida xalq deputatlari mahalliy Kengashlarining bo‘shab qolgan deputatlik o‘rinlariga saylovlarni tashkil etish va o‘tkazishda Saylov kodeksi normalarining bir xil tarzda qo‘llanilishi, shuningdek, saylov jihozlarining saqlanish holatini o‘rganish natijalari to‘g‘risida
O‘zbekiston Respublikasi Saylov kodeksining 14 va 16-moddalariga muvofiq O‘zbekiston Respublikasi Markaziy saylov komissiyasi qaror qiladi:
1. Buxoro, Navoiy, Toshkent, Jizzax va Sirdaryo viloyatlarida xalq deputatlari mahalliy Kengashlarining bo‘shab qolgan deputatlik o‘rinlariga saylovlarni tashkil etish va o‘tkazishda Saylov kodeksi normalarining bir xil tarzda qo‘llanilishi amaliyoti, shuningdek, saylov jihozlarining saqlanishi holatini o‘rganish natijalari bo‘yicha Markaziy saylov komissiyasi ishchi guruhining axboroti maʼlumot uchun qabul qilinsin.
2. Buxoro, Navoiy, Toshkent, Jizzax va Sirdaryo viloyatlari xalq deputatlari mahalliy Kengashlari, viloyat xokimliklari va viloyat saylov komissiyalari Markaziy saylov komissiyasi ishchi guruhining 2022-yilda hududlarda olib borgan xalq deputatlari mahalliy Kengashlarining bo‘shab qolgan deputatlik o‘rinlariga saylovlarni tashkil etish va o‘tkazishda Saylov kodeksi normalarining bir xil tarzda qo‘llanilishi amaliyotini, shuningdek, saylov jihozlarining saqlanish holatini o‘rganish natijalari to‘g‘risidagi maʼlumotnomasida ko‘rsatilgan kamchiliklar bartaraf etilishini hamda undan kelib chiqadigan vazifalar bajarilishini taʼminlasinlar.
3. Mahalliy Kengashlarga o‘tkaziladigan saylovlarni tashkil etish va o‘tkazish borasidagi ishlarni takomillashtirish bo‘yicha chora-tadbirlar rejasi ilovaga muvofiq tasdiqlansin.
Mazkur chora-tadbirlar rejasi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga hamda masʼul vazirlik va idoralarga ijrosini tashkil etish uchun yuborilsin.
4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, masʼul vazirlik va idoralar chora-tadbirlar rejasining ijrosi yuzasidan amalga oshirilayotgan ishlar xususida har oyning 5-sanasiga qadar, to‘liq ijrosi yuzasidan 2023-yil 5-iyuliga qadar Markaziy saylov komissiyasiga batafsil maʼlumot taqdim etsinlar.
Markaziy saylov komissiyasi ishchi guruhi (B.Yunusov) Kotibiyatning Tashkiliy-nazorat bo‘limi (M.Miralimov) bilan hamkorlikda chora-tadbirlar rejasining ijrosini doimiy monitoring qilib borsin, taqdim etilgan maʼlumotlarning tahlili asosida ularni umumlashtirsin va Komissiyaga axborot berib borsin.
5. Mazkur qaror O‘zbekiston Respublikasi Markaziy saylov komissiyasining rasmiy veb-saytida eʼlon qilinsin.
6. Ushbu qarorning ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari B.Kuchkarov zimmasiga yuklansin.
Rais Z. Nizamxodjayev
