YXHT DIIHB delegatsiyasi 2023-yilda bo‘lib o‘tgan O‘zbekiston Respublikasi Prezidenti saylovi va Konstitutsiyaviy referendum jarayonlarini kuzatish natijalari bo‘yicha Yakuniy hisobotlarni taqdim etish maqsadida O‘zbekistonga tashrif buyurdi.
DIIHB delegatsiyasiga O‘zbekiston Respublikasi Prezidenti saylovini kuzatish bo‘yicha missiya rahbari, elchi Urshula Gatsek boshchilik qilmoqda. Delegatsiya tarkibida, shuningdek, DIIHB Saylov departamenti rahbari o‘rinbosari Ulvi Axundlu va DIIHB Saylov departamenti maslahatchisi Kaxa Inaishvililar ham bor.
YXHT DIIHB delegatsiyasi tashrifi doirasida bir qator mutasaddi vazirlik va idoralar hamda siyosiy partiyalar uchun Konstitutsiyaviy referendum va O‘zbekiston Respublikasi Prezidenti saylovini o‘tkazish bo‘yicha monitoring natijalari yuzasidan yakuniy hisobotlarning rasmiy taqdimoti va ularda keltirilgan xulosa va tavsiyalarini muhokamasi bo‘lib o‘tadi.
26-mart kuni DIIHB delegatsiyasining Markaziy saylov komissiyasi Raisi Z. Nizamxodjayev bilan uchrashuvi bo‘lib o‘tdi.
Z. Nizamxodjayev ta’kidlaganidek, DIIHB Yakuniy hisobotlarda O‘zbekiston saylov amaliyotini takomillashtirishda xayrixoh ekanligini bildirgan holda soha rivoji uchun tegishli tavsiyalarni taqdim etgan.
Mazkur hisobotlar e’lon qilingan buyon undagi tavsiyalarni tahlil qilish, ularni o‘z vaqtida umumlashtirish, shuningdek, O‘zbekiston saylov qonunchiligi va amaliyotida qo‘llash hamda tavsiyalar ijrosini ta’minlash bo‘yicha qator tashkiliy-amaliy chora-tadbirlar amalga oshirildi.
Mazkur ishga saylov jarayonining barcha ishtirokchilari, ekspert va mutaxassislar, siyosiy partiyalar, fuqarolik jamiyati institutlari vakillari, olimlar va amaliyotchilar jalb qilingan.
Yakuniy hisobotni o‘rganishga, shuningdek Saylov tizimlari xalqaro fondi (IFES) va YXHTning O‘zbekistondagi loyihalari koordinatori ofisi ekspertlari ham jalb etilishi rejalashtirilgan. Ular hisobotni BMT, YXHTning universal hujjatlari va demokratik va erkin saylovlar standartlarini belgilovchi xalqaro huquqning boshqa hujjatlari bilan qiyosiy tahlil qilish, shuningdek, xalqaro amaliyot bilan taqqoslashda bevosita yordam ko‘rsatadi.
Uchrashuvda elchi Urshula Gatsek Yakuniy hisobotlar saylov sohasida kelgusidagi muloqot va samarali hamkorlik uchun muhim asos bo‘lib xizmat qilishini ta’kidladi. Hisobotning asosiy qismlaridan biri bo‘lajak saylovlar bo‘yicha milliy qonunchilik bazasi va amaliyotini takomillashtirishga qaratilgan tavsiyalardir. Ular saylovni tashkil etish uchun mas’ul organlar, davlat hokimiyati va boshqaruvi organlari, shuningdek, siyosiy partiyalar, OAV, fuqarolik jamiyati va boshqa manfaatdor shaxslar tomonidan ko‘rib chiqish uchun mo‘ljallangan.
“Bunday tashriflar saylov tashkilotchilariga YXHT DIIHB vakillari bilan samarali muloqot qilish, ayrim masalalarga oydinlik kiritish va DIIHB tavsiyalarini amalga oshirish bo‘yicha birgalikda ishlashning mumkin bo‘lgan yo‘llarini muhokama qilish imkonini yaratib beradi”, – dedi elchi.
Uchrashuv yakunida O‘zbekistonda YXHT DIIHB tavsiyalarini amalga oshirish uchun zarur imkoniyatlardan samarali foydalanish bo‘yicha katta ishlar amalga oshirilayotgani ta’kidlandi. Bu, o‘z navbatida, xalqaro standartlarga javob beradigan saylovlar bo‘yicha ilg‘or tajribalarni joriy etish orqali mamlakatimizning demokratik rivojlanishiga bevosita xizmat qiladi.
MARKAZIY SAYLOV KOMISSIYASI
