MDH Parlamentlararo Assambleyasi (PA) Kengashi kotibiyatining taklifiga binoan O‘zbekiston Respublikasi Markaziy saylov komissiyasi raisi Z. Nizamxodjayev boshchiligidagi delegatsiya 2024-yil 23-mayda ochilishi bo‘lib o‘tadigan “Hamdo‘stlik mamlakatlarida Prezidentlik instituti” xalqaro ilmiy-amaliy konferensiyasida ishtirok etmoqda.
O‘zbekiston delegatsiyasining tashrif dasturi doirasida, 22-may kuni MSK raisi Z. Nizomxadjayev va Sankt-Peterburg shahri Saylov komissiyasi raisi M. Meyksin o‘rtasida uchrashuvi bo‘lib o‘tdi.
M. Meyksin delegatsiya a’zolarini 2024-yil 8-sentyabrda bo‘lib o‘tadigan yagona ovoz berish kunida saylovlarga tayyorgarlik ko‘rish va uni o‘tkazish bo‘yicha asosiy tadbirlar bilan tanishtirdi.
Yagona ovoz berish kunida uch kun davom etadigan, ya’ni 6,7 va 8-sentyabr kunlari, prezident saylovlari kabi tashkil etiladigan Sankt-Peterburg gubernatori va Munitsipal kengashlar saylovlari bo‘lib o‘tishi qayd etib o‘tildi.
Munitsipal Kengashlarga saylovlar Sankt-Peterburgning 111 ta okrugida bo‘lib o‘tadi.
Munitsipal Kengashlarga deputatlar xuddi gubernator kabi 5-yilga saylanadi. Shuningdek, Qonunchilik majlisiga qo‘shimcha saylovlar bo‘lib o‘tadi.
M. Meyksin ta’kidlaganidek, saylov komissiyasining 30-yillik faoliyati davomida turli darajadagi 650 dan ortiq saylov kampaniyalari o‘tkazildi. 2024-yil 1-yanvar holatiga ko‘ra Sankt-Peterburg bo‘yicha Saylov ro‘yxatida 3 816 980 ta saylovchi mavjud bo‘lib, saylovchilar ro‘yxati yiliga ikki marotaba aktuallashtiriladi. Sankt-Peterburgning saylov tizimi 1947 ta uchastka va 64 ta hududiy saylov komissiyalaridan iborat bo‘lib, ularda 23 mingga yaqin kishi ishlaydi.
Uchrashuv ishtirokchilariga fuqarolarning saylov qonunchiligi masalalari bo‘yicha ta’lim olishini ta’minlash, ayniqsa yoshlarning huquqiy madaniyatini oshirish bo‘yicha chora-tadbirlar haqida ham ma’lumot berildi. Xususan, 2023-yil 9-fevralda yoshlarining saylov madaniyati va huquqiy savodxonligini oshirish maqsadida Yoshlar saylov komissiyasi tuzilganligi ta’kidlandi.
16-may kuni Sankt-Peterburg saylov komissiyasi o‘z yig‘ilishida 2024-yilda yosh va bo‘lajak saylovchilarning huquqiy madaniyatini oshirish uchun Yosh saylovchilar kuni, tanlovlar, olimpiadalar va ma’rifiy tadbirlarni o‘tkazish to‘g‘risida qaror qabul qildi.
Uchrashuv davomida O‘zbekiston MSK raisi Z. Nizamxodjayev milliy saylov tizimidagi islohotlar haqida so‘z yuritdi. O‘zbekiston jamiyat hayotining barcha sohalarini, jumladan, saylov sohasini modernizatsiya qilishga qaratilgan chuqur va keng qamrovli islohotlar davrini boshidan kechirayotganini ta’kidladi. Ushbu islohotlar birinchi navbatda demokratiya va qonun ustuvorligini mustahkamlashga qaratilgan.
O‘zbekistonda xalqaro saylov standartlarini milliy qonunchilik va amaliyotga yanada joriy qilish, saylov jarayoni sifati va shaffofligini oshirishga qaratilgan yangi raqamli texnologiyalarni tatbiq etish orqali milliy saylov tizimi takomillashtirilmoqda.
Z.Nizamxodjayev 2023-yil 18-dekabrda qabul qilingan “O‘zbekiston Respublikasining ayrim qonun hujjatlariga saylov va referendum o‘tkazish tartibini yanada takomillashtirishga qaratilgan o‘zgartirish va qo‘shimchalar kiritish to‘g‘risida”gi O‘zbekiston Respublikasi Konstitutsiyaviy Qonunining mazmun-mohiyati va ahamiyatiga to‘xtalib o‘tdi.
O‘zbekiston MSK raisi Sankt-Peterburg saylov komissiyasi raisi M. Meyksinga saylov monitoringida ishtirok etish taklifi uchun minnatdorchilik izhor etdi va ularning muvaffaqiyatli o‘tkazilishiga ishonch bildirdi.
Uchrashuvda shuningdek MDH PA DRMXI direktori I. Mushket, DRMXI direktori o‘rinbosari Ye. Yeremenko, O‘zbekiston MSK a’zosi G. Raximova va O‘zbekistonning Sankt-Peterburgdagi Bosh konsuli A. Maxmudovlar ishtirok etdilar.
Markaziy saylov komissiyasi
