2004-yil 26-dekabrdagi saylov va 2005-yil 9-yanvardagi takroriy ovoz berish natijalariga koʻra Oʻzbekiston Respublikasi Oliy Majlis Qonunchilik palatasining barcha – 120 deputati saylandi va roʻyxatga olindi.

Saylovlarda 489 deputatlikka nomzod, shu jumladan, siyosiy partiyalardan – 435 kishi va saylovchilarning tashabbuskor guruhlaridan – 54 kishi ishtirok etdi. 2004-yil 26-dekabrdagi asosiy saylovda 12 mln. 197 ming159 nafar (85,1 foiz) saylovchi, 2005-yil 9-yanvar kuni oʻtkazilgan takroriy saylovlarda 5 mln. 400 mingdan ortiq kishi yoki takroriy ovoz berishda ishtirok etish huquqiga ega boʻlgan saylovchilarning qariyb 80 foizi qatnashdi.

Saylov natijasida Oʻzbekiston Liberal-demokratik partiyasi saylovchilarining eng koʻp ovozini oldi, bu partiyadan deputatlarning 34,2 foizi saylandi; Oʻzbekiston Xalq demokratik partiyasidan deputatlarning 23,3 foizi saylandi. Shuningdek Fidokorlar partiyasining 18 aʼzosi, “Milliy tiklanish” partiyasining 11 aʻzosi, “Adolat” partiyasining 10 aʻzosi Qonunchilik palatasiga saylandi.

Okruglarning deyarli 77 foizida bir deputatlik mantadi uchun 4 tadan 6 tagacha nomzod kurash olib bordi. Jumladan, 55 ta saylov okrugida bir deputatlik mandati uchun toʻrttadan, 32 ta okrugda beshtadan, 5 ta okrugda oltitadan nomzod kurashdi. Bundan tashqari, 5 ta saylov okrugida bir deputatlik mandati uchun ikkitadan, 23 ta okrugda uchtadan nomzod bahslashdi.

Saylov kompaniyasi jarayonini mamlakatimizning 493, xorijning 107 ommaviy axborot vositasi yoritib bordi. Saylovda dunyoning 40 ga yaqin mamlakatidan 228 xorijiy kuzatuvchi, jumladan Mustaqil Davlatlar Hamdoʻstligi, Yevropada Xavfsizlik va Hamkorlik Tashkiloti kuzatuvchilari missiyalari qatnashdi.