O‘zbekiston Respublikasi

Markaziy saylov komissiyasining qarori

№1239                          2023-yil 14-aprel

O‘zbekiston Respublikasining referendumiga tayyorgarlik ko‘rish va uni o‘tkazish yuzasidan ayrim okrug komissiyalari raislarining axborotlari to‘g‘risida

“O‘zbekiston Respublikasining referendumi to‘g‘risida”gi O‘zbekiston Respublikasi Qonunining 18 va 20-moddalari hamda O‘zbekiston Respublikasi Markaziy saylov komissiyasining “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasi referendumiga tayyorgarlik ko‘rish va uni o‘tkazish kalendar rejasini tasdiqlash haqida”gi 2023-yil 16-martdagi 1209-son qaroriga muvofiq O‘zbekiston Respublikasi Markaziy saylov komissiyasi qaror qiladi:

1. O‘zbekiston Respublikasining referendumiga tayyorgarlik ko‘rish va uni o‘tkazish yuzasidan amalga oshirilayotgan ishlar xususida referendum o‘tkazuvchi 2-Andijon okrug komissiyasi (K.Komilov), referendum o‘tkazuvchi 11-Farg‘ona viloyati okrug komissiyasi (E.Nuraliyev) raislarining axborotlari maʼlumot uchun qabul qilinsin.

2. O‘zbekiston Respublikasining referendumini o‘tkazuvchi okrug komissiyalari raislari:

O‘zbekiston Respublikasi referendumiga tayyorgarlik ko‘rish va uni o‘tkazish Kalendar rejasida belgilangan tadbirlar o‘z vaqtida amalga oshirilishi nazorat qilinishini;

referendum o‘tkazuvchi uchastka komissiyalari tomonidan ovoz beruvchi fuqarolar ro‘yxatiga aniqlik kiritish ishlarini mutasaddi idoralar bilan hamkorlikda muvofiqlashtirib borilishini;

ovoz berish byulletenlarini referendum uchastkalari bo‘yicha taqsimlashni va referendum o‘tkazuvchi uchastka komissiyalariga yetkazib berilishini belgilangan tartibda tashkillashtirilishini;

yetkazib berilgan ovoz berish byulletenlari referendum o‘tkazuvchi uchastka komissiyalari tomonidan sifatli saqlanishi ustidan nazorat o‘rnatilishini;

referendum okrugi hududida muddatidan oldin ovoz berish jarayonining borishi haqida Markaziy saylov komissiyasiga kunlik maʼlumot berib borilishini;

ovoz beruvchi fuqarolarning va referendum boshqa ishtirokchilarining murojaatlarini referendum to‘g‘risidagi qonunchilikda belgilangan muddatlarda ko‘rib chiqib, asoslantirilgan javob berilishini;

referendum o‘tkazuvchi uchastka komissiyalarining faoliyatini muvofiqlashtirilib borilishini;

fuqarolarning o‘zini o‘zi boshqarish organlari va siyosiy partiyalardan kuzatuvchilarga arizalar kelib tushishiga qarab, belgilangan namunadagi mandatlar besh kunlik muddatdan kechiktirmay topshirilishini taʼminlasin.

3. Mazkur qaror O‘zbekiston Respublikasi Markaziy saylov komissiyasining rasmiy veb-saytida eʼlon qilinsin.

4. Mazkur qaror ijrosini nazorat qilish O‘zbekiston Respublikasi Markaziy saylov komissiyasi raisining o‘rinbosari B. Kuchkarov zimmasiga yuklansin.

Rais                                                                         Z. Nizamxodjayev